كلمه
كلمة وطن..
عبدالله رجب ابوعدنان
كلمه وطن بتشجع الخاينين
بتضم حواري السكك
واللي قابض واللي متشكك
واللي صارر أحلام الغلابه ف مناديل
وقت الصفا هيا الأم والأمومة
وفايده دا كله إيه
طول عمرها بالشقا معجونه
وبليل المنافقين
خطوط عريضه مرسومه
ومغطيه الحلم بسواد الليل
كلمه وطن يا ملاك الروح
ادي كل الانبيا مرو من هنا
كانت وطول عمرها جنه
وارض الرسالات
مش طيف ولا خيالات
إنما حاضنه الكل
وف نور الصبح سوسنه
والشاهد السيده العذراء
وابنها السيد المسيح
كلمه وطن تملا الكون تفاريح
حصن أمان ضد الريح
وفينك يا ثوره
ما كنتي بنت بنوت
خنقوكي بالموت
ولا عيدان الخيزران قلبت توت
واناجي رب السما ف الملكوت
وازاي تكون كلمه وطن تمثيل
وازاي نخون الخضره
ف ضي الليل
والبنت شاده خطوط الموضه
وطاله من ازاز
أحمر شفايف
تريد الأمل يكون ف يوم إنجاز
والموت ليك يا بو قلب ضعيف
وابنك يا امي عمره ما كان خايف
وحتى لو الصوت رزاز
والجسم مجرد هيكل ونحيف
خديني ف توهة الاحزان
وارميني على ضفاف النيل
وكليم الله وقف على جبل الطور
شاف من بعيد نور
ملا الكون رحمه وسرور
ولا كان ف علمه إن الوطن
يكون ف يوم مكسور
أو إن البت البنوت
تغامر بالسكوت
مرشرشه ألوان العوزه على كفن الموت
النواح على نعش الوطن
أصبح اناشيد
واهازيج
وإن ركب زمام الوطن بليد
وإن الثوره ف كل وطن مجرد
تهريج
مدعومه بخونه واباطيل
كلمه وطن...
عبدالله رجب ابوعدنان
شاعر الغلابه
ليست هناك تعليقات:
إرسال تعليق