هالكرم ما اجملو.// بقلم الشاعر : ناجي فرحات

 قصيدة باللهجة المحكية..

هالكرم ما اجملو..

مليان متلك شو حلو

والدالية لتعربشت فوق الحجار

متلك وراقا

ع هبوب الريح

...من كثر الحنين

عم يتمايلو

سبحان الله هالكرم

(( قصدي الوجه ))

ما أجملو!

ضحكاتك فراشات لما بكرمنا حلّوا

صار الزهر فستان ابيض ع الشجر..

والورد الاحمر نام ع خدو الندى..

وعصفور زقزق ع الهدا..

وذاع الخبر...

...سبحان الله هالكرم...

(( قصدي الوجه ))

ما أجملو

حلوة العريشة

والتحت منها سهر..

وكل الأحبة تجمعوا

وهون السحر!

وما عرفت هالضو السطع

...هو نور من وجهك لمع ... ولا القمر..

وسبحان الله هالقمر..

(( قصدي الوجه ))

ما أجملو!

بدر السما لما ارتفع..

وبالنور ع الدنيا سطع..

وتجمعوا النجمات .. حولو يسهروا..

واجمل الكلمات ..

قالوا وسطروا:

...سبحان الله هالبدر..

(( قصدي الوجه ))..

ما أجملو..!

زهر الربيع..

من زهر خدك مستحي..

الجلنار لما بتمرقي ..

بين الاوراق بيختفي..

وجهك ربيع وطل من بعد الشتي..

سبحان الله هالزهر

(( قصدي الوجه ))

ما أجملو!

========

ناجي فرحات _ سوريا