قصة حياة اﻷنبياء// بقلم الشاعرة :د. نجوى محمد زين الدين

 

أوعى تعمل نفسك مش واخد بالك من البوست دا ممكن يكون حجه لك يوم القيامة أمام الله يالا بينا نكمل قصة حياة نبي الله ادريس عليه وعلي نبينا الصلاة والسلام

الجزء 2  (والاخير )

لاحظ المُفسرون واللغويون إن اسم سيدنا إدريس هو أصلاً عربي الصيغة والمعنى ؛ بإعتباره مُشتق من الدراسة.

وده إللي خلاهم يقولوا إنه تم تسميته بإدريس لكثرة دراسته وقرائته لكتب الله وحفظه لصحف أبونا آدم وابنه شيث , أو لإنه كان أول مَن خط بالقلم زي ما وَرد في الحديث الشريف.

وكونه -عليه السلام - أول مَن خَط بالقلم مكنش الشيء الوحيد إللي تميّز بيه سيدنا إدريس , إنما كان ليه حاجات تانية كان هو أول واحد عملها وإتميّز بيها , ودي إللي بيسميها العلماء أوليّات إدريس .

• زي إنه كان أول من إكتشف الخياطة , الشيخ الشعراوي بيقول إن الناس من قبله كانوا بيلبسوا جلود تسترهم .

• يُقال مكنش بيكتب بالقلم إنما كان بيكتب بالرمل .. و يُقال هو أصل فنون الكتابة على الجدران اللي ظهرت في مصر والعراق

• هو كمان كان أول من فهم علم الحساب و الفلك و النجوم

ومن أوليّاته إنه كان أول من استخدم الدوآب للهجرة عليها..

•  ده غير إنه كان بارع في الهندسة المعمارية وأول من صنع الالات والأدوات.

•وكان أبو المعرفة وأصل معظم العلوم 

_

سيدنا إدريس كان من أنشط الانبياء وأكثرهم إجتهاداً في التذكير بالله والدعوة إليه..

لدرجة يُقال إنه ماسابش بني آدم في الارض إلا ودعاه للخير .. 

فـ أوحى الله إليه في يوم من الايام "أن يا إدريس إني أرفع لك كل يوم من العمل كـ مثل أعمال أهل الأرض كلهم"

لأنه كان بيدعوهم للخير فـ الدال على الخير كـ فاعله ❤

وقيل إنه كان خياط وكان  مع كل إبرة يغرزها يُسبّح الله ويذكره .. فـ كان يُمسي حين يُمسي وليس على الأرض أحد أعظم منه أجراً.

_

سيدنا إدريس من كُتر حِرصه على الأجر دعا ربنا يطوّل في عمره أكتر عشان ياخد ثواب أكبر..

وفيه روايات مُتعددة بتحكي عن ملاك من الملائكة حصلت بينه وبين سيدنا إدريس  قصة خلّتهم يتلاقوا ويتقاربوا لحد ما أصبح الملاك ده خليل سيدنا إدريس وأقرب الملائكة إليه..

فـ في يوم من الأيام سيدنا إدريس طلب من الملاك ده إنه يكلم ملاك الموت بالنيابة عنه ويوصّيه يتأخر عليه شوية عشان ياخد ثواب أكبر بالإجتهاد في العمل والشكر والعبادة أكتر وأكتر..

الملاك رد عليه إن الأعمار مكتوبة وإن ربنا قضى مفيش نفس هتتأخر عن معادها

سيدنا إدريس كان عارف الحقيقة دي ومكنش عنده إعتراض على قضاء الله وأمره لكنه كان شايف إن الطلب ده أطيب لنفسه , فـ وافق الملك وعرض عليه يجي معاه ويكلم ملك الموت بنفسه.

فعلاً أخد المَلَك سيدنا إدريس وإبتدا يطلع بيه من السماء الدنيا إلى السماء التانية إلى التالتة لحد ما وصل للسماء الرابعة ولاقوا مَلَك الموت هناك

إبتدا الملاك إللي مع سيدنا إدريس يكلم مَلَك الموت ويقوله الطلب الي طلبه سيدنا إدريس

فملاك الموت سأله عن مكان سيدنا إدريس حالياً

رد عليه إنه معاه في السماء الرابعة

مَلَك الموت إندهش وإستعجب وسبّح بـ قُدرة ربنا!

وبعدها شرح سبب إستعجابه فحكاله إنه ربنا وكّله بقبض روح سيدنا إدريس دلوقتي في السما الرابعة! , وإنه كان محتار إزاي هيقبضها في السماء الرابعة مع إن نبي الله إدريس في الأرض!

الملاك سأله فاضل قد ايه من عُمر النبي فكان الرد إنه مافاضلش ولا حتى طرفة عين.

وبكده قبض مَلَك الموت روح سيدنا إدريس وهو في السماء الرابعة .. [وقيل قبض روحه كان عند مطلع الشمس]

ودي كانت الرواية إللي نقلها ابن عباس وغيره من العلماء عن كعب الأحبار في تفسير آية {وَرَفَعْنَاهُ مَكَانًا عَلِيًّا } .. [ آية 57 : سورة مريم ]

وإن صَحّت الرواية السابقة فـ هنفهم السبب إللي خلّى رسولنا الكريم لما عدّى على السماء الرابعة وهو بيرتقي إلى السموات في رحلة الإسراء والمعراج, قال "مرحباً بالنبي الصالح والأخ الصالح".

وفي تفسير آخر بيخلّي الرفع في الآية رفع معنوي بمعنى رفعنا مكانته وشأنه ومنزلته وذِكره.

_

وفي الأول و في الاخر دي كلها اجتهادات العلماء في محاولة تفسير كتاب الله , وربنا وحده الأعلى والأعلم بما يُصيب ويُخطئ منها .. قال تعالى "وما يعلم تأويله إلا الله والراسخون في العلم يقولون امنا به كل من عند ربنا"❤

وبكدا نكون خلصنا قصة حياة سيدنا ادريس وان شاء الله من الحلقة القادمة هنتكلم عن النبي الثالث ف سلسلة قصص حياة الانبياء الا وهو نبي الله نوح عليه السلام 

قصة حياة  اﻷنبياء♥️

د. نجوى محمد زين الدين